„Секогаш беше со спуштена глава, многу повлечен“ – полицијата ја обезбедува зградата во која живее Коста

Полицијата во моментов е пред зградата во која живее 14-годишниот Коста кој изврши масакр во основното училиште „Владислав Рибникар“ во Белград, во кој уби осум врсници и еден чувар, а повреди неколку лица.

Како што јавува репортерот на „Блиц“, моментално е забранет влез во зградата, а се претресува станот.

Според соседите, родителите на момчето отсекогаш биле љубезни, а имаат и ќерка.

„Често ги гледав, тој е познат доктор. Имаат и помала ќерка. Момчето секогаш беше културно и фино, но секогаш повлечено“, вели еден од работниците во близина на зградата во која живее семејството на момчето.

Според приказната на соседот, во таа зграда заедно живеат родителите на Коста и неговата помлада сестра.

„Кога одговара, само ја спушта главата и трепнува, толку беше повлечен“, опишува сосед кој бил близок со семејството.

Како што вели, детето одело и во музичко училиште.

„Да ви кажам искрено, толку пати сум била кај нив. Бевме таму еден за друг без разлика на се. Но, не знаев дека има пиштоли, тоа мора да се обезбеди… “,вели сосед кој сакал да остане анонимен и бил многу близок со семејството на момчето.

Како што тој продолжува, семејството со години живее на оваа адреса. Тој додава и дека Коста постојано менувал училишта, но не знае зошто.

„Постојано одеше на натпревари, беше одличен ученик, не знам што се случи“, коментираше тој.

Пред училиштето има потресени деца, но и родители кои се во паника. Улиците се блокирани, а има силно полициско присуство.

„Слушнав пукање, некои ученици веднаш излегоа во ходникот да видат што се случува. Отпрвин мислев дека нешто се слуша надвор. Сите почнаа да врескаат, настана општа паника, сите почнаа да трчаат, кога излегов го видов, дојде и впери пиштол во сите нас“, низ солзи раскажува за „Блиц“ еден од шокираните ученици.

Ученикот го донел пиштолот на татко му и започнал напад. Тој е приведен на распит во полициска станица.