Путин итно испрати главен преговарач во Вашингтон

Рускиот претседател Владимир Путин го испрати својот главен преговарач во Вашингтон, каде ќе престојува оваа недела, а денеска ќе ја има првата од серијата средби со Стив Виткоф, специјалниот пратеник на претседателот Доналд Трамп.

Кирил Дмитриев е клучен економски советник на рускиот претседател и е еден од највисоките руски функционери што ги посетил САД од почетокот на инвазијата на Украина во февруари 2022 година, објави Би-Би-Си. Тој раководи со фонд за директни инвестиции и се очекува клучна тема на средбата да бидат економските прашања.

Средбата меѓу Дмитриев и Виткоф ќе се одржи само неколку дена откако американскиот претседател Трамп изјави дека е „многу лут“ и „гневен“ на Путин поради ситуацијата во врска со преговорите за ставање крај на војната во Украина.

Си-Би-Ес Њуз објави дека средбата треба да се одржи денеска, кога се очекува Трамп да го детализира планот за воведување царини на увозот од повеќето земји во светот, што предизвика големо потресување на пазарите.

Во интервјуто за NBC News во неделата, Трамп, исто така, се закани дека „ќе ја удри силно руската економија“ доколку наскоро не се постигне договор. Трамп конкретно се оспори со коментарите на Путин кои го напаѓаат кредибилитетот на украинскиот претседател Володимир Зеленски, иако Трамп претходно упати слични навреди и истакна дека треба да се одржат избори во Украина и дека нема легитимитет.

Трамп се закани дека ќе воведе царина од 50 отсто за земјите кои купуваат руска нафта доколку Путин не се согласи на прекин на огнот со Украина во рок од еден месец. Министерството за финансии на САД привремено ги укина санкциите за Дмитриев за да може без никакви проблеми да влезе во САД.

Пред неговото пристигнување во Америка, Дмитриев даде изјава на социјалните мрежи, во која изјави дека „отпорот на дијалогот меѓу САД и Русија е реален“, но дека подобрените односи меѓу земјите може да бидат „она што му треба на светот за трајна глобална безбедност и мир“.

Официјална Москва тврди дека украинскиот претседател Зеленски останал на власт по истекот на неговиот мандат и дека тој не е валиден преговарач. Сепак, Киев одговара дека изборите беа одложени кога беше прогласена вонредна состојба и земјата се бореше во хаосот на војната што сега влегува во својата четврта година.

Според податоците што ги анализира Би-Би-Си, независната медиумска група Медиазона и доброволците кои бројат жртви од почетокот на војната, повеќе од 100.000 руски воен персонал се убиени откако Русија ја започна инвазијата на Украина. Во моментов Русија контролира околу 20 отсто од територијата на Украина.

Украина последен пат ги ажурираше податоците за жртвите во декември 2024 година, кога Зеленски потврди дека загинале 43.000 украински војници и офицери. Западните аналитичари сметаат дека оваа бројка е потценета.