Кешишев: Палевски го поли возилото, Боре го фрли чкорчето

На денешното рочиште во Кривичниот суд за случајот со двојното убиство на Вања Ѓорчевска и Панче Жежовски, првообвинетиот Љупчо Палевски – Палчо започна да го испрашува обвинетиот Влатко Кешишев. Палевски најави дека има 97 прашања за Кешишев.

Кешишев претходно сведочеше дека не го видел убиството на Панче Жежовски, но го видел Палевски со пиштол за време на убиството на Вања.

На прашањето на Палевски кој бил организатор и инсистирал да одат во Демир Капија, Кешишев одговори дека не се сеќава на точни датуми, но дека Велибор Манев („Вељо“) бил најголем иницијатор, постојано убедувајќи ги да одат во Демир Капија да бараат злато. Кешишев рече дека по многу убедувања, Палевски се согласил да одат за да видат дека нема ништо. Тие отишле, Манев и Боре Видевски влегле во пештерата, додека Палевски и Кешишев останале надвор до доаѓањето на полицијата.

Во врска со одземањето на пиштолот на Палевски по потпишувањето на записниците во полициската станица во Неготино, Кешишев потврди дека сите четворица заедно отишле во полициската станица, каде Палевски влегол да потпише за одземање на неговиот дозволен пиштол, додека останатите чекале во автомобилот.

Кешишев се согласи со Палевски дека било веќе разденето кога сите четворица пристигнале во куќата на Велибор Манев по враќањето од Неготино, по што тој и Палевски заминале за Скопје и се вратиле во штабот.

На прашањето дали времето и лицата во Демир Капија одговараат на снимките, Кешишев одговори потврдно.

Во однос на палењето на автомобилот „цитроен“, Палевски го потсети Кешишев дека пред Судот и во Обвинителството дал исказ дека Палевски го полил возилото, а Боре Видевски го запалил. Палевски го праша дали тврдењето на Манев дека тој (Палевски) го полил и запалил автомобилот е вистинито. Кешишев остана на својот претходен исказ, велејќи дека Палевски го полил возилото, а Боре го фрлил чкорчето. На прашањето на Палевски дали Кешишев фрлил нешто во автомобилот, Кешишев одговори негативно, додавајќи дека ги фрлил само лопатите кога му било кажано.