Симулација однесување во кризни ситуации

Симулациска вежба за брза евакуација и однесување во кризни ситуации спроведе  СВР Битола во ООУ „Стив Наумов“ во Битола.

Денеска полициски службеници од СВР Битола во соработка со Општинската организација на Црвениот Крст од Битола,  Територијалната противпожарна единица Битола како и екипа на Итна медицинска помош Битола   во основното училиште „Стив Наумов” во Битола, за учениците од ова училиште спроведоа симулациска вежба на тема: „Начин на однесување во кризни ситуации”. Вежбата беше спроведена со цел учениците да се запознаат со начините и протоколите на однесување во кризни ситуации, потоа за начините на евакуација од пожар, совладување на паниката и безбедно и организирано евакуирање од училиштето во претпоставена ситуација.

Симулациите и едукативните активности на СВР и СИМП се редовна пракса, којашто во ова време се интензивираат во Македонија. По трагедијата во дискотеката во Кочани се погласни и појасни се информациите за недостатокот на пожарникари на територија на целата држава. Оттука, владата започна подготовка на нов Закон за пожарникарска служба кој ќе овозможи зајакнување на капацитетите на пожарникарските служби. Според досегашниот Закон за пожарникарството, пожарникарството е дел од единствениот систем за заштита и спасување во Републиката; 20 мај е ден на пожарникарството; територијални проптив-пожарни единици формираат градот Скопје и поголемите градови во државата, а ги покриваат помалите општини кадешто нема единици – на пример Битолската ТППЕ освен Битола ги покрива и општините Новаци и Могила. Заради оперативно делување при гаснење големи пожари, битолската и другите територијални противпожарни единици делуваат како противпожарни единици на Република Македонија.

Инаку, според законот  Минималниот број на професионални пожарникари во противпожарните единици треба да изнесува:

– во општините до 10.000 жители – девет професионални пожарникари,

– во општините од 10.000 до 15.000 жители – 13 професионални пожарникари,

– во општините од 15.000 до 24.000 жители – 17 професионални пожарникари и

– во општините со над 24 000 жители – еден професионален пожарникар на 1.500 жители.

За помош при пожари на отворено предвидено е и ангажирање на т.н сезонски пожарникари.