Мицотакис во посета на Санторини: Останете смирени, властите ја следат сеизмичката активност

Грчките власти се во подготвеност и ја следат зголемената сеизмичка активност на островот Санторини, изјави денеска грчкиот премиер Киријакос Мицотакис, повикувајќи ги граѓаните да останат смирени и да ги следат упатствата на службата за цивилна заштита.

„Уште еднаш, сакам да ги уверам жителите на Санторини и на соседните острови, кои деновиве се пред тест, дека државниот механизам е на нивна страна“, рече Мицотакис за време на неговата посета на островот, додавајќи дека подготвеноста и превенцијата се клучни, пренесе Ројтерс.

Тој изрази надеж дека оваа појава брзо ќе заврши и дека островот целосно ќе се врати во својот нормален ритам.