По 300 евра за грѓаните на Црна Гора кои беа во самоизолација, а нивните имиња беа јавно објавени

Владата на Црна Гора даде согласност за надомест на нематеријална штета на лица чии имиња се објавени на нејзината веб-страница врз основа на Одлуката на Националното координативно тело за заразни болести.

„Заштитникот на имотно правните интереси на Црна Гора е задолжен да склучи спогодба со 2.720 лица во износ од 300 евра на име надоместок за нематеријална штета поради повреда на лични права со објавување на лични податоци, беше соопштено по седницата на Владата.

Во март 2020 година, Националното координативно тело донесе одлука да објави список на имиња на лица во самоизолација.

Уставниот суд уште во јуни донесе одлука дека тоа не е во согласност со највисокиот правен акт, по што беа поднесени бројни тужби за нарушување на правото на приватност.

Поради тоа што некои граѓани ја нарушија самоизолацијата, Владата на 21 март објави список на сите кои се во самоизолација, вклучително и мнозинството кои ја почитуваа таа мерка. Дополнително, порачаа дека секој граѓанин треба да знае кој од неговите соседи и сограѓани го загрозува со недисциплина. Списоците го содржеле името и презимето на лицето во самоизолација, како и адресата на живеење. Иако подоцна беа повлечени од веб-страницата на Владата, овие податоци одамна стојат или сè уште стојат на многу портали во земјава и регионот, пренесуваат регионалните медиуми.

Според нив, тогашниот премиер Душко Марковиќ велел дека ги разбира причините за критиките, но и тврдел дека здравјето на граѓаните е поважно од човековите права.

Невладините организации, тогаш предупредуваа дека некој треба да поднесе оставка поради објавувањето на списоците, но тоа не се случи.

Извор: Максфакс