Борел предупредува: Поради Украина ќе видиме провокации во Босна и Херцеговина

„Поради опасноста последиците од украинската криза да се прелеат и на другите земји од соседството на Русија, Европската Унија мора да им помогне на Молдавија и Грузија и внимателно да го разгледаат Западен Балкан, бидејќи таму ќе видиме провокации, особено во Босна и Херцеговина“, рече високиот претставник на ЕУ Џозеф Борел.

Тој, според медиумите во регионот, ова го изјавил по состанокот на министрите за надворешни работи на Унијата кои воведоа остри санкции кон Русија поради воениот упад во Украина.

Европските дипломатски претставници, исто така, им кажале на новинарите дека одлуката за зголемување на трупите во мисијата на ЕУ „Алтеа“ во Босна и Херцеговина и посилната посветеност на Западен Балкан е одговор на влошената безбедност во поголем обем не само поради Украина, туку и поради руското влијание во Босна како и Црна Гора и Србија, пишуваат медиумите.

Во исто време, очигледно со намера да ја нагласи подготвеноста за поддршка на Западен Балкан, Европската комисија повтори дека ќе помогне за закрепнување на регионот преку инвестициски пакет од 3,2 милијарди евра, објавен од октомври 2020 година.

И германскиот медиум „Дојче веле“ со видливо внимание ја пренесува анализата на австрискиот весник „Стандард“ во која се наведува дека рускиот напад врз Украина доведе до преземање мерки на претпазливост и во Југоисточна Европа.