Заев најави поврат на ДДВ за граѓаните: Од 1 јули секое семејство ќе добива по околу 1.200 денари годишно

Со проектот за поврат на 15 проценти од ДДВ кој е најавен дека ќе стартува од 1 јули, премиерот Зоран Заев очекува дека на самиот старт граѓаните ќе добијат меѓу 60 до 100 милиони евра годишно.

Загубите од приходите на ДДВ, според премиерот, сега се движат околу 30 милиони евра, а штетата е уште поголема бидејќи се создава нелојална конкуренција.

– Ќе имаме одличен систем и очекувањата се дека граѓаните ќе добијат меѓу 60 до 100 милиони евра годишно на самиот старт, а зависно од процентот на успешност, толку повеќе ќе раснат и вкупните пари што ќе одат кај граѓаните, но и во буџетот, рече Заев, додавајќи дека доцна синоќа имал состанок со претставници на Министерството за финансии и Управата за јавни приходи.

Со воведувањето на повратот на ДДВ се очекува граѓаните сами да бидат контролори и да добијат значителни приноси, но и да се подобри наплатата на ДДВ.

Според математиката на премиерот, доколку годишно се вратат кај граѓаните околу 100 милиони евра, пресметките покажуваат дека секој од вкупно 2 милиони Македонци ќе добие по 5 евра годишно во просек. Ако едно просечно семејство има 4 члена, математиката вели дека секое семејство во просек, годишно ќе добие околу 20 евра или 1.200 денари.