Што се случува во Хрватска: Бројот на доброволци на воена обука се зголеми за 100%

Минатата година бројот на доброволци кои служат воен рок во Хрватска е зголемен за 100 отсто во однос на претходната 2023 година, а од годинава на воена обука пристигнале речиси 300, соопшти денеска Министерството за одбрана.

Од 298 волонтери, 254 се млади мажи, а 44 се млади жени, а меѓу нив, се соопштува, има и шест врвни спортисти, кои ќе поминат низ скратена тренинг програма прилагодена на нивните професионални обврски. Обуката ја започнаа во армискиот центар во Пожега, а командантот Томислав Матиќ вели дека нивната мотивација е подготвеноста да и служат на татковината.

Министерството потсетува дека финансиските услови за хрватските војници се подобрија минатата година и дека се повеќе млади луѓе ја препознаваат воената кариера како можност за стекнување воени вештини и драгоцено искуство преку програма за воена обука.

Во споредба со 2023 година, зголемувањето на бројот на војници доброволци е за 100 отсто поголем. Овогодинешниот прв циклус на доброволна воена обука трае 40 работни дена и завршува на 9 април.

„Програмата е дизајнирана да им обезбеди основни знаења и дисциплини кои ќе им користат без разлика дали ќе одлучат да ја продолжат својата кариера во хрватските вооружени сили или ќе се вратат на цивилни работни места“, се вели во соопштението на Министерството за одбрана.